張家界之旅（DAY 2）｜ 世界自然遺產 5A 級嘅張家界國家森林公園，袁家界風景區、天子山風景區、必睇嘅大型歌舞演出《千古情》
張家界以多個人間仙境而聞名，吸引咗世界各地嘅遊客蜂擁而至，嚟一睹自然景觀嘅風采。世界自然遺產 5A 級嘅張家界國家森林公園，佔地 130 平方公里，係中國第一個國家森林公園。呢度四周山地環抱，氣候暖濕，地處武陵山中，擁有超過 2,000 座石峰，森林覆蓋率高達 88% 。 1992 年，聯合國教科文組織將張家界國家森林公園列入「世界自然遺產名錄」，更喺 2004 年，列入全球首批「世界地質公園」。
文章目錄
行程安排
俾大家參考下第二日嘅行程，提提大家，因為今次係媒體行程，行嘅都係 VIP 通道，慳咗好多排隊嘅時間。大家 plan 行程嘅時候，要預埋排隊嘅時間，所以如果自己自由行，有需要預兩日先可以行晒。
第一日遊記可參考：張家界自由行（DAY 1）｜香港高鐵直達張家界交通，第一日去張家界七十二奇樓景區、溪布街夜市
早上喺酒店享用早餐之後，我哋就出發去張家界國家森林公園。呢度係世界自然遺產，景色真係冇得頂。我哋先去咗袁家界風景區，搭百龍電梯上山，觀賞咗三千奇峰、神兵聚會、後花園同天下第一橋。仲見到咗電影《阿凡達》中哈利路亞山嘅原型——乾坤柱。
之後，我哋去咗天子山風景區，搭纜車落山，參觀咗賀龍公園、天子山觀景台、御筆峰同仙女散花。夜晚，我哋仲睇咗大型歌舞演出《千古情》，真係非常精彩。今晚繼續住張家界納佰利凱悅悠選酒店。
早上7:30（享用早餐）
喺酒店享用咗豐富嘅早餐，為今日嘅行程做好準備。
早上9:00（坐旅遊巴出發）
大家喺酒店大堂集合，準備出發前往今日嘅景區，車程大概 10 分鐘左右。
早上9:10（袁家界風景區）
到達世界自然遺產 5A 級——張家界國家森林公園。先去咗袁家界風景區 ，我哋搭百龍電梯上山，參觀咗：
- 觀三千奇峰
- 神兵聚會
- 後花園
- 天下第一橋
- 電影《阿凡達》中哈利路亞山原型「乾坤柱」
中午 12:30
午餐喺武陵源山上享用《武陵風味宴》。
下午 14:30（天子山風景區）
下午我哋去咗天子山風景區，搭纜車下山。景區內有：
- 賀龍公園
- 天子山觀景臺
- 獨筆峰
- 仙女散花
下午 17:30
離開景區，前往晚餐餐廳。
下午 17:40（張家界溪步街嘅網紅餐廳——印象·鯢宴）
晚餐喺張家界招牌菜《三下鍋特色宴》。呢度嘅菜式好有特色，味道好食，係我嚟張家界覺得最好食嘅一餐。
晚上19:20（大型歌舞演出《千古情》）
晚餐後，去睇咗大型歌舞演出《千古情》，大概睇一個鐘，呢個表演值得一睇，原本以為係好老土嘅表演，但開場第一幕已經覺得好驚喜，睇完會令你對張家界有更加深刻嘅理解同欣賞。
晚間
今晚都係住喺張家界納佰利凱悅悠選酒店，去景區真係好方便。
開始
▼建議大家去張家界一定要食飽早餐，因為通常全日嘅行程都要喺山上面，真係要有足夠嘅體力先頂得住。酒店提供嘅早餐非常豐富，有中式嘅粥、包、炒粉麵，亦有西式嘅麵包、火腿、煎蛋，仲有新鮮嘅水果同果汁，選擇非常多。
袁家界風景區
袁家界風景區，亦係電影《阿凡達》多個取景地點，當中哈利路亞山便係以「乾坤柱」為原型設計。站喺景區觀景台上，可以盡收三千奇峰嘅壯麗景色，真係雄險秀美，各有特色。峽谷深處，千八根石峰石柱奇偉突立，令人嘆為觀止。
▼由酒店出發去到武陵源，車程只需要 5 分鐘
百龍天梯
百龍天梯，高度達 335 米，其中垂直高差 326 米。呢個天梯由 154 米嘅山體內堅井同埋 172 米嘅貼山鋼結構井架組成。天梯採用三台雙層全暴露觀光電梯並列分體運行，每台次可以載客 50 人，運行速度達到 3 米/秒。三台電梯同時運行，每小時往返量可以達到 4,000 人次。
百龍天梯嘅修建實現咗「山上遊，山下住」嘅目標，提供咗優質嘅交通保障。天梯將袁家界嘅天下第一橋、迷魂台、天懸白練，以及烏龍寨、楊家界等絕世美景從幕后推向前台，仲將天子山、袁家界、金鞭溪等精品旅遊線路連接起來，徹底解決咗多年困擾景區嘅交通瓶頸問題。
▼大家出去旅行，最緊張一定係去廁所嘅問題，景區每隔一段路都會有廁所，但就唔好預咗會好乾淨。
▼呢個係一出電梯嘅景色
▼大家唔使擔心帶唔帶野食上山，因為山上有好多舖頭，嘢飲嘢食都有得賣。行一段路就會聞到陣陣香味，而且，山上嘅食物價錢都算合理，唔會特別貴。
▼山裡面標示都好清晰，大家唔洗擔心會喺山裡面蕩失路
▼隻馬騮喺度食緊雪條呀
哈利路亞懸浮山
2010 年 1 月 25 日，張家界嘅「南天一柱」（又名乾坤柱）正式被更名為《阿凡達》嘅「哈利路亞山」。當日數百名土著居民同埋海內外遊客一齊見證咗呢個更名儀式。「南天一柱」係張家界「三千奇峰」其中一座，位於世界自然遺產武陵源風景名勝區袁家界景區南端，海拔高度達1074米，垂直高度大約 150 米。
呢座山峰頂部植被茂盛，峰體造型奇特，垂直節理明顯，好似用刀劈斧削咁巍然屹立喺張家界，有頂天立地嘅氣勢，因此又被稱為乾坤柱。無論係自然景觀定係文化意義，都令呢座山峰成為張家界嘅一大亮點。
天下第一橋
「天下第一橋」係張家界嘅「十大絕景」之一，亦係袁家界嘅標誌性景點。呢座橋係居於兩山之間形成嘅一座天然石橋，兩山本來係連成一體，橋身係兩山相連嘅關鍵部分。但因為中間嘅石質較為薄弱，經過風化、崩塌作用嘅影響，再加上日曬雨淋、流水洗刷、山洪衝擊，久而久之，就形成咗今日呢個特別嘅奇景。
「天下第一橋」橋面寬兩米，厚四米，跨度有二十幾米，高度達三百幾米，係目前世界上發現落差最高嘅天然石橋。呢個奇景真係令人嘆為觀止，完全係大自然嘅鬼斧神工。
▼沿路都會奶茶、小食舖頭，唔洗擔心行山會餓親！
▼落山嗰陣，有間舖頭係幫您畫名喺張張家界嘅poster上面，人民幣 10 蚊一張
午餐 – 武陵源山上，袁家寨子
▼今日我哋喺山上面食 Lunch ，真係好特別嘅體驗。湖南菜餐餐都會有幾煲嘢喺度，熱辣辣咁上。
天子山風景區
天子山景區位於武陵源北部，與張家界、索溪峪山水相依，總面積有 67 平方公里，最高海拔為 1,262.5 米。呢個景區因古代土家族領袖向大坤自稱天子而得名。天子山處於峰林演化史嘅壯年期，有「峰林之王」之稱。景區東、西、南三面石峰林立，溝壑縱橫。
▼食完 Lunch，我地搭返景區裡面嘅環保車去天子山風景區，車程大概半個鐘左右，建議大家要食暈車藥，食飽之後搭車行山路，會好想嘔
▼山上嘅天氣真係變幻莫測，無論見到天氣幾好，都要記得帶備雨衣同雨傘啊！因為高山嘅氣候變化得特別快，可能一陣間仲係晴天，下一刻就會落雨。
賀龍公園
賀龍公園位於石家檐東側，園內立有賀龍元帥嘅銅像。呢座銅像嘅頭部形象逼真，肩以下塑成岩石狀，好似武陵奇峰，巍然屹立喺石台之上。旁邊仲有一匹戰馬，緊緊依偎喺主人嘅右側，增添咗整個銅像嘅生動感同歷史氣息。
▼導遊話，呢間係中國唯一一家落戶喺世界遺產山頂嘅麥當勞，亦係華南地區最高嘅麥當勞。
御笔峰
御笔峰位於天子閣西側約 80 米嘅深谷中。一排有 6 根石柱，每根石柱高約百米，柱體方正如削，頂天並立，參差相連，上細下粗，形狀好似筆杆。據傳呢啲石柱係向王天子所用嘅筆。
仙女散花
出咗賀龍公園大門，向東行唔遠，就可以見到正前方有三層峰群。其中一峰側面睇起來好似一個少女，手捧花籃，面向東邊企住。
▼啱啱落完雨，行去搭纜車嘅路段，見到雲霧圍住個山，真係超靚，好似仙境咁！
天子山索道
天子山索道係單線循環式脫掛抱索器客運索道，全部設備都係從奧地利 Doppelmayr 公司進口。索道全長 2,084 米，上下高差 692 米，配有 38 個封閉式觀光吊廂。「誰人識得天子山，歸來不看天下山」，天子山索道嘅建成，令武陵源風景區嘅旅遊交通環境大大改善。以前遊人花半日功夫上天子山，只係睇一眼，宜家乘坐索道就可以輕鬆上山，盡覽天子山嘅美景。
天子山索道，成人票單程每張 HK$77 ，兒童票( 14 – 17 歲）單程每張 HK$39 。購買網址：
https://www.klook.com/zh-HK/activity/120647-tianzi-mountain-cableway/?aid=16&aff_ext=zhangjiajie
▼落山之後，發現連 KFC、Starbucks都有 
▼意外發現，仲以為呢度係奶茶店，原來竟然係武陵源風景區嘅民政局（婚姻註冊處）！
晚餐-印象鯢宴
▼晚餐我哋去張家界溪步街嘅網紅餐廳——印象·鯢宴，由景區過嚟只需要 10 分鐘車程。呢間餐廳係一間土家閣樓式餐廳，裝修十分大氣，共有四層。每層都有唔同特色，有趕年宴、趕場宴、宴席廳同有機食材展示廳。呢度主要係打張家界嘅特色美食，非常有地道風味。
▼打鼓迎賓
▼有機食材展示廳
▼聽講呢度總共有 108 道菜品俾你自選，真係多到眼花撩亂
▼必試嘅菜式，土家三娃滾娃魚
▼印象鯢宴，張家界招牌菜《三下鍋特色宴》
▼苗族人有一個非常特別嘅敬酒禮儀，叫做《高山流水》。呢個敬酒禮係用嚟迎接賓客嘅，當中以酒迎賓，歌不停酒不停。
千古情
張家界《千古情》景區融合咗張家界武陵源嘅自然美景，根植於張家界本土文化。滄海桑田、瀟湘傳說、大庸輝煌、神秘湘西、土家風情、紅色記憶等等，結合咗VR、AR等各種高科技手段，令中外遊客可以穿越萬年時光，感受古老同現代張家界嘅獨特魅力。
呢場大型歌舞《張家界千古情》，同張家界嘅山水景觀互相輝映。用夢幻嘅舞台效果，喺水、陸、空三維空間裡演繹張家界嘅歷史同現代。表演帶領遊客進入一場文化盛宴，體驗張家界豐富嘅歷史同文化。呢個表演值得一睇，原本以為係好老土嘅表演，但開場第一幕已經覺得好驚喜，睇完會令你對張家界有更加深刻嘅理解同欣賞。《张家界千古情》演出成人票，觀眾席每張 HK$170 ，貴賓席每張 HK$191 。購買網址：
https://www.klook.com/zh-CN/activity/120663-zhangjiajie-eternal-love/?aid=16&aff_ext=zhangjiajie
▼建議大家買觀眾席就可以啦，今次小編坐貴賓席，感覺有啲太前了，同睇馬戲團一樣，揀後啲嘅位置就可以睇曬成嗰場唔同角度嘅表演！
▼《千古情》真係大製作！有無人機、乾冰同超大道具滿場飛！表演場景宏大精美，簡直就好似睇一場大型舞台劇。
▼張家界千古情景區就好似一個迷你小樂園，地方幾大，入面唔單止有好多賣嘢食嘅地方，仲有一條古街可以打卡影相。
結束一日行程，返到酒店都已經 10 點啦。今日行咗成日山，超攰。酒店內有按摩服務，大家可以去按摩放鬆下，仲可以叫按摩師上房按都得，價錢都係一樣，人民幣 178 蚊一個鐘。因為酒店送咗張 50 蚊優惠券，所以最後買單都係人民幣 128 蚊。導遊話，按摩記得要比 10 至 20 蚊貼士按摩師呀！
